Eze 21 | NdeIBE | STEP | Ilizwi likaJehova lafika kimi lisithi:

Ezekiel 21

IBhabhiloni, Inkemba KaNkulunkulu Yokwahlulela

1 Ilizwi likaJehova lafika kimi lisithi:

2 “Ndodana yomuntu, khangelisa ubuso bakho eJerusalema utshumayele okubi ngendawo engcwele. Phrofetha okubi ngelizwe lako-Israyeli 3 uthi kulo: “Nanku okutshiwo nguJehova Wobukhosi: Ngixabane lani. Ngizahwatsha inkemba yami emxhakeni wayo ngisuse kuwe abalungileyo lababi.

4 Ngokuba ngizasusa abalungileyo lababi, inkemba yami izahwatshelwa ukumelana labo bonke abavela eningizimu kanye lasenyakatho.

5 Lapho-ke abantu bonke bazakwazi ukuthi mina nginguJehova sengihwatshe inkemba yami emxhakeni wayo, kayiyikubuyela futhi.’

6 “Ngakho-ke bubula ndodana yomuntu! Bubula phambi kwabo ngenhliziyo edabukileyo kanye losizi olukhulu. 7 Nxa bekubuza besithi, ‘Kungani na ububula?’ uzakuthi, ‘Ngenxa yezindaba ezifikayo. Zonke izinhliziyo zizanyela lezandla zonke zibe buthakathaka, imimoya yonke izaphela amandla lamadolo wonke abe buthakathaka njengamanzi.’ Kuyeza! Ngempela kuzakwenzakala, kutsho uJehova Wobukhosi.”

8 Ilizwi likaJehova lafika kimi lisithi:

9 “Ndodana yomuntu, phrofetha uthi, ‘Nanku okutshiwo nguJehova: “ ‘Inkemba, inkemba, ilolwe njalo yalolongwa –

10 Ilolelwe ukubulala, ilolongelwe ukuphazima njengombane. “ ‘Kambe sizathokoza na ngentonga yobukhosi yendodana yami uJuda? Inkemba iyazeyisa zonke izigodo ezinjalo.

11 “ ‘Inkemba ibekelwe ukuba ilolongwe, ukuba iphathwe ngesandla; iyalolwa ilolongwe, yenziwe ilungele isandla sombulali.

12 Hlaba umkhosi ulile, ndodana yomuntu, ngoba imelane labantu bami; imelane lamakhosana wonke ako-Israyeli. Aphoselwa kuyo inkemba ndawonye labantu bami. Ngakho-ke bamba isihlathi sakho.

13 “ ‘Ukuhlolwa kuyeza impela. Njalo kuzakuba njani nxa intonga kaJuda yobukhosi, edelelwa yinkemba, ingasaqhubeki? kutsho uJehova Wobukhosi.’

14 “Ngakho-ke, ndodana yomuntu, phrofetha uqakeze izandla zakho. Inkemba kayigadle kabili, lanxa kungaba kathathu. Yinkemba yokubulala – inkemba yokubulala kakhulu, ebahanqayo ivela macele wonke.

15 Ukuze izinhliziyo zibe buthakathaka labawileyo babe banengi, sengibeke inkemba yokubulala kuwo wonke amasango abo. O! Yenzelwe ukuphazima njengombane, iphathelwe ukubulala.

16 Wena nkemba, geca kwesokudla, uphinde kwesenxele, loba kungaphi ubukhali bakho obuphendukela khona.

17 Lami futhi ngizaqakeza izandla zami, njalo ulaka lwami luzadeda. Mina uJehova sengikhulumile.”

18 Ilizwi likaJehova lafika kimi lisithi:

19 “Ndodana yomuntu, canda imigwaqo emibili yenkemba yenkosi yaseBhabhiloni ukuba ihambe kuyo, yomibili iqalise elizweni linye. Yenza insika yesiqondiso lapho okuphambuka khona umgwaqo oya edolobheni. 20 Canda omunye umgwaqo wenkemba ukuba izemelana leRaba yama-Amoni lomunye ukumelana loJuda kanye leJerusalema elivikelweyo. 21 Ngoba inkosi yaseBhabhiloni izakuma lapho imigwaqo eyehlukana khona, lapho okuhlangana khona imigwaqo emibili, ukuba ifune ibika: Izaphosa inkatho ngemitshoko, izabuza izithombe zayo, izahlola isibindi. 22 Esandleni sayo sokudla kuzakuza inkatho yeJerusalema, lapho ezamisa khona imigqala yokudiliza, lokunika umlayo wokubulala, lokuhlaba umkhosi wempi, lokumisa imigqala yokudiliza amasango, lokwakha amadundulu kanye lokumisa izindawo zokuvimbezela. 23 Kuzakhanya angathi libika lamanga kulabo asebefungele ukuthobeka kuyo, kodwa yona izabakhumbuza icala labo ibathumbe.

24 “Ngakho nanku okutshiwo nguJehova Wobukhosi: ‘Njengoba lina bantu lingikhumbuze icala lenu ngokuhlamuka kwenu okusobala, libonakalisa izono zenu kukho konke elikwenzayo – njengoba lenze lokhu, lizathunjwa.

25 “ ‘Wena nkosana yako-Israyeli exhwalileyo njalo embi, esuku lwayo selufikile, esikhathi sokujeziswa kwayo sesifike esijini sayo,

26 nanku okutshiwo nguJehova Wobukhosi: Khupha iqhiye, yethula umqhele. Akuyikuba njengoba kwakunjalo: Abaphansi bazaphakanyiswa kuthi abaphakemeyo behliselwe phansi.

27 Unxiwa! Unxiwa! Ngizawenza ube lunxiwa! Kawuyikubuyiselwa kuze kufike lowo ongowakhe ngokuqondileyo, onguye engizamnika wona.’

28 “Njalo wena, ndodana yomuntu, phrofetha uthi, ‘Nanku okutshiwo nguJehova Wobukhosi ngama-Amoni kanye lezithuko zawo: “ ‘Inkemba, inkemba, ihwatshelwe ukubulala, ilolongelwe ukuqothula lokuphazima njengombane!

29 Langaphezu kwemibono yamanga ngawe, lokuhlahlula okungamanga ngawe, izabekwa ezintanyeni zababi okumele babulawe, abasuku lwabo selufikile, abasikhathi sokujeziswa kwabo sesifike esijini saso.

30 Buyisela inkemba emxhakeni wayo. Endaweni owadalelwa kuyo, elizweni labokhokho bakho, ngizakwahlulela khona.

31 Ngizathululela ulaka lwami phezu kwakho ngiphefumelele lentukuthelo yami etshisayo kuwe; ngizakunikela ebantwini abalesihluku, abantu abakwaziyo ukuqothula.

32 Uzakuba zinkuni zomlilo, igazi lakho lizachithelwa elizweni lakini, kawuyikukhunjulwa futhi; ngoba mina uJehova sengikhulumile.’ ”